أحمد حاتم يتحدث عن شخصيته في “الملحد” ويؤكد: العمل كان لوجه الله وليس عن الإلحاد فقط

كشف الفنان أحمد حاتم، خلال ظهوره في برنامج “عندي سؤال” مع الإعلامي محمد قيس، عن كواليس تجسيده لشخصيته في فيلم “الملحد”، مشيرًا إلى أنه لم يشعر بالخوف من تقديمها رغم حساسية الموضوع المطروح.

وأوضح حاتم: “أنا مش شخص ملحد على الإطلاق، أنا مؤمن وده فضل كبير من ربنا، وعشان كده معنديش رهبة في التعامل مع النوع ده من الأدوار، لما جالي الدور حسيت إني أنسب واحد يعمله، مع إنه فيه كلام قوي، لكن محستش إني خايف خالص”

وأضاف: “أنا كل مقاصدي ربنا أعلم بيها، وحاجات شايفها كويسة جدًا وعاملها لوجه الله، وأنا مش بتكلم عن الإلحاد بشكل عام، لكن عن شخصية (يحيى) اللي ألحد نتيجة ظروف معينة، وده ليه علاقة بوالده وتربيته القصة بتتكلم في ده”

وفيما يتعلق بعدم عرض الفيلم حتى الآن، قال: “الموضوع مهزنيش، بس حسيت الموضوع كبير، وقت لما منزلش كنت حاسس إنه عادي هينزل لكن لما الفيلم منزلش فعليًا، الموضوع ممكن يكون أكبر من الطريقة اللي أنا كنت واخدها بيها، وفيه ناس كانت بتقولي متزعلش، وأنا فعلًا مكنتش زعلان، ممكن يكون أحسن وقت مش دلوقتي للناس إنها تستقبله”

تجدر الإشارة إلى أن فيلم “الملحد” تعرض لانتقادات واسعة بعد طرح البوستر الرسمي للعمل مما أدى لتصدر هاشتاج بمقاطعة الفيلم عبر مواقع التواصل الاجتماعي المختلفة.

وتدور أحداث الفيلم في إطار درامي حول قضية التطرف الديني والإلحاد التي تصيب الشباب وتأثير انتشار مثل هذه الظواهر على الأفراد والمجتمع.

الفيلم من تأليف إبراهيم عيسى وإخراج محمد العدل ويشارك فيه عدد من النجوم منهم محمود حميدة وأحمد حاتم وحسين فهمي وصابرين.

من ناحية أخرى، يُشار إلى أن تناول موضوع الإلحاد والتطرف الديني يعد من المواضيع الحساسة التي تحتاج إلى معالجة دقيقة وفهم عميق من قبل صناع الفن لضمان عدم الإساءة لأي فئة أو معتقد.